“J-Морс” — сонца беларускага рока

“J-Морс” падцвердзіў статус самага папулярнага беларускага рок-калектыву сучаснасці — у панядзелак гурт сабраў аншлаг у ГЦК. Магчыма, нехта патлумачыў бы такі поспех тым, што білеты былі даволі танныя (ад 7 тысяч рублёў), але, з іншага боку, зразумела, што на абы-каго людзі і за бясплатна не пойдуць...
Канцэрт распачаўся на 15 хвілін пазней — “морсы” доўга адладжвалі апаратуру для выступлення. Фуру з уласным абсталяваннем ім прывезці ў Гомель не ўдалося па тэхнічных прычынах, а таму давялося выступаць на мясцовым, чым, як прызнаўся саліст гурта Уладзімір Пугач, яны былі вельмі незадаволены. І сапраўды, гук, які даносіўся са сцэны, пакідаў жадаць лепшага... Затое самі песні і артысты прымаліся залай вельмі горача — кампазіцыі з плыткі “Маё сонца” ўгадваліся літаральна з першых акордаў і надзвычай эмацыянальна віталіся публікай. Адна расчуленая прыхільніца беларускіх рокераў нават ускарабкалася на сцэну і падарыла Пугачу ўласную карціну, якую яна намалявала спецыяльна для яго, натхніўшыся песнямі гурта!
Найбольш яскравым момантам імпрэзы стала выкананне кавер-версіі знакамітага хіта 80-х — песні “Земля в иллюминаторе”. Усё ж такі, як ні вярці, класіка ёсць класіка, а нашым выканаўцам можна толькі пажадаць, каб з цягам часу і іх трэкі выклікалі ў народа такія ж бурныя пазітыўныя эмоцыі.
Падрабязнасці канцэрта, а таксама інтэрв’ю з Уладзімірам Пугачам і ўдзельнікамі гурта “J-Морс” чытайце на старонках “Молодежного пульса”.
Наталля Старчанка