Да Хэлаўіна — клёвая вечарына

Спробы святкаваць Хэлаўін у Гомелі былі і раней, але ўпершыню гэта было зроблена з такім размахам. На вечарынку, што адбылася ў ГЦК, прыйшло каля 3000 чалавек! А гэта вельмі шмат, асабліва ўлічваючы тое, што весяліцца ў такія дні беларускай культурай не прадугледжана.
— А для мяне гэта ніякае і не свята, я проста прыйшоў адарвацца разам з сябрамі, — кажа Лёха ў “прыкідзе” вампіра. — Мы не хочам нікога абразіць і не зазываем нейкую нечысць, мы проста весялімся, бо любім клубную музыку.
Хэлаўін па-гомельску захапіў адразу тры танцполы гарадскога цэнтра культуры, суправаджаўся бліскучым лазерным шоу і, вядома, энергетычнымі выступленнямі лонданскага DJ Mikro, DJ Man-G з Варшавы, кіяўлян DJ Ярыка і DJ Pablo Honey, а таксама беларускіх майстроў кружэлак.
Людзей у розных цікавых касцюмах было нямнога — звычайна публіка абмяжоўвалася слядамі намаляванай крыві на твары, валасамі, што з дапамогай гелю тырчалі ва ўсе бакі, дзікімі аскаламі пры ўсмешцы і кіпцюрамі (тут асабліва пастараліся дзяўчаты). Некаторыя наведвальнікі былі са свечкамі і ў масках, некаторыя хаваліся ў плашчы і шляпы і больш нагадвалі мульцяшнага Чорнага Плашча, а не Графа Дракулу. Між тым, традыцыя пераапранання сягае таксама ў далёкую мінуўшчыну — у старажытнасці касцюм мусіў быць настолькі страшэнным, каб адпугнуць злых духаў і асабліва мярцвякоў, якія выходзілі на зямлю, каб забраць з сабой жывых.
Арганізатарамі гэтай супервечарынкі выступілі студыя “Компас” і ГЦК. А сённяшні Хэлаўін прайшоў пад брэндам “Субкультуры”.
— “Субкультура” — гэта фестываль сучаснай клубнай культуры! Пачаўся ён з аднаго вялікага фэста ў Гомелі, а зараз пад сцягам “Субкультура” праходзяць як маленькія вечарынкі з удзелам разнастайных ды-джэяў, так і вялікія фэсты, — паведаміў адзін з кіраўнікоў студыі Сяргей Ціханоўскі.
У бліжэйшы час “Компас” плануе парадаваць не толькі гамяльчан, але і астатніх беларусаў — у планах правесці вя-лікія фэсты ва ўсіх абласных гарадах і буйное фінальнае мерапрыемства ў Мінску на 20 тысяч чалавек!
Наталля СТАРЧАНКА