На калгасным полі прапісваецца соя

У калгасе ( СВК) “Урыцкае” Гомельскага раёна пачалі займацца вырошчваннем соі. Пасля дажджоў расліны хутка ідуць у рост, набіраюць сілу. Ужо зараз спецыялісты раёна і гаспадаркі лічаць, што на кожным з сарака гектараў можна атрымаць не менш як 30 цэнтнераў зерня.
— Такая ўраджайнасць дасць нам магчымасць ужо ў наступным годзе поўнасцю забяспечыць сябе ўласным насеннем гэтай культуры і значна пашырыць плошчы пад яе,— зазначае намеснік старшыні калгаса М. М. Доліч.— У раёне пакуль, апрача нас, ніхто не вырошчвае сою, але ў асобных гаспадарках вобласці гэтым займаюцца. Прадаюць вырашчаны ўраджай прадпрыемствам харчовай прамысловасці і маюць добрую грашовую выручку. У нас іншыя мэты.
Мікалай Мікалаевіч расказвае, што калгас спецыялізуецца на вырошчванні ялавічыны, мае вялікае пагалоўе буйной рагатай жывёлы і ў апошні час многае робіць па забеспячэнню яе высокаспажыўнымі ўласнымі кармамі. Соя будзе добрым кампанентам для абагачэння рацыёну, а значыць, пры найменшых затратах будуць павялічвацца прывагі маладняку буйной рагатай жывёлы на дарошчванні і адкорме.
На эксперыментальным полi ва Урыцкім зараз бываюць кіраўнікі і спецыялісты іншых гаспадарак раёна, каб пераняць вопыт па вырошчванню, а затым і выкарыстанню соі. У наступным годзе гэтую пакуль рэдкую для нашых палёў культуру плануюць пасеяць ужо ў некалькіх гаспадарках.
Сцяпан БАЛОТКІН