Абрадам пераносу свечкі жыхары Акцябра Буда-Кашалёўскага раёну адзначылі дзень Казанскай іконы Божай Маці

Абрадам пераносу свечкі жыхары Акцябра Буда-Кашалёўскага раёну адзначылі дзень Казанскай іконы Божай Маці. Па ўсталяванай у аграгарадку традыцыі на свята Казанскай іконы Божай Маці адбываецца ўрачысты перанос свечкі з адной хаты ў другую, дзе яна знаходзіцца на працягу наступнага года. Для гэтага, як правіла, выбіраюць найстарэйшых і найболей паважаных жыхароў мясцовасці. У Акцябры гэта Ульяна Захарчанка, якой больш за 80 гадоў. Абрад пераносу свечкі ў аграгарадку вядомы з пасляваенных часоў. Гісторыя яго ўзнікнення наступная. У другой палове 40-х гадоў мінулага стагоддзя ў вёсцы раптоўна пачала хварэць і паміраць жывёла. Каб супрацьстаяць гэтаму, жыхары за адну ноч зрабілі свечку і саткалі ручнік. З гэтымі рэчамі і разам са святаром яны выйшлі на скрыжаванне дарог. Прадстаўнік духавенства асвячаў жывёлу, якая пасля святога абрада праходзіла пад ручніком. У гэты момант хтосьці трымаў запаленую свечку. Рытуал падзейнічаў: скаціна пачала ачуньваць. Доўгі час абрад пераносу свечкі быў у аграгарадку ў забыцці. Ён адрадзіўся ў апошнія гады дзякуючы святару храма Пакрова Прасвятой Багародзіцы а.г. Камунар, айцу Паўлу і сельскаму Савету. Была прыведзена ў належны стан крынічка. Штогадовая традыцыя ладзіць абрад у Акцябры застаецца нязменнай.