Узоры друкаванай спадчыны

У аддзеле рэдкай кнігі абласной універсальнай бібліятэкі імя. У. І. Леніна адбылося адкрыццё выставы “Кніга Беларусі”, што знаёміць з друкаванымі выданнямі апошняй чвэрці XIX — пачатку XXI cтагоддзя, якія выпушчаны як на тэрыторыі Беларусі, так і за яе межамі і па свайму зместу звязаны з гісторыяй і культурай нашай краіны. Найбольш раннія выданні, прадстаўленыя ў экспазіцыі, — гэта “Гомельские народные песни (белорусские и малорусские) с приложением 83 местных пословиц” (СПб., 1888), сабраныя членам Імператарскага Рускага геаграфічнага таварыства Зінаідай Радчанка ў Дзятлавіцкай воласці Гомельскага павета Магілёўскай губерні і “Материалы для изучения быта и языка русского населения Северо-Западного края” (СПб.,1890), сабраныя і сістэматызаваныя знакамітым этнографам, збіральнікам беларускай народнай вусна-паэтычнай творчасці Паўлам Шэйнам. На выставе звяртае на сябе ўвагу факсімільнае ўзнаўленне тэкcту “Жыціе блажэннай Еўфрасінні, ігуменні манастыра Уседзяржыцеля святога Спаса ў горадзе Полацку” выдавецтва Беларускага Экзархата. Увогуле кнігі, выпушчаныя напрыканцы XX і ў пачатку XXI стагоддзя, вылучаюцца сваімі шыкоўнымі пераплётамі, багатымі фотаілюстрацыямі і фундаментальным зместам, у значнай частцы заснаваным на архіўных матэрыялах.