У Гомелі праходзяць навуковыя чытанні, прысвечаныя Івану Навуменку

Памяці цудоўнага пісьменніка, акадэміка Івана Навуменкі прысвечаны чарговыя Міжнародныя чытанні “Рэгіянальнае, нацыянальнае і агульначалавечае ў славянскіх літаратурах”, якія ў чацвёрты раз адбываюцца пад эгідай НАН Беларусі на базе ГДУ імя Ф. Скарыны і Славянскай бібліятэкі сёння і заўтра. Як паведаміла дырэктар Славянскай бібліятэкі Александрына Зубец, удзел у канферэнцыі прымаюць вядучыя вучоныя з Расіі, Украіны, Польшчы, Беларусі, Германіі, Велікабрытаніі і іншых краінаў. У праграме – даследаванне спадчыны Івана Навуменкі, аналіз найбольш актуальных з’яў у культурным жыцці славянскіх народаў, вызначэнне перспектыў класічнай літаратуры ў эпоху глабалізацыі. Гомельшчына – унікальны мацярык на велічным абшары славянскага сусвету. Тут, на скрыжаванні арэолаў шматвекавога бытавання разнастайных уплываў, склалася адметна-духоўная традыцыя, што ярка праявілася найперш у слове. Невыпадкова, што якраз на Гомельшчыне нарадзіліся Кірыла Тураўскі, чатыры Народных пісьменнікі Беларусі.