Археолагі ў Дняпры

У выдавецтве “Дзясна Паліграф” ў Чарнігаве выйшла з друку кніга “Археологические исследования в Еврорегионе “Днепр” в 2011 году”. Першае выданне штогодніка ажыццёўлена ў рамках супрацоўніцтва Бранскай, Гомельскай і Чарнігаўскай абласцей, якія ўваходзяць у прыгранічнае згуртаванне Еўрарэгіён “Днепр”. У прадмове да кнігі кіраўнік Чарнігаўскай абласной дзяржаўнай адміністрацыі Уладзімір Хаменка падкрэсліў, што тысячу год назад нашы регіёны ўваходзілі ў склад Чарнігава-Северскай зямлі — аднаго з найбольш магутных дзяржаўна-палітычных аб’яднанняў сярэднявечнай Цэнтральна-Усходняй Еўропы. Новы маштабны міжнародны гуманітарны праект — выданне аб археалагічных даследаваннях у Еўрарэгіёне “Днепр” — закліканы аператыўна інфармаваць грамадскасць аб адкрыццях, якія дагэтуль былі здабыткам вузкага кола прафесіяналаў. На старонках выдання “сустрэліся” больш за 50 археолагаў і гісторыкаў, якія не толькі жывуць на тэрыторыі Еўрарэгіёна “Днепр”, а і тыя, якія праводзяць там даследаванні. Кніга складаецца з трох раздзелаў. Яны прысвечаны Чарнігаўскай, Бранскай і Гомельскай абласцям. Беларусь прадстаўлена артыкуламі і паведамленнямі выкладчыкаў гістфака ГДУ імя Ф. Скарыны, членаў Гомельскага навуковага аб’яднання “Таварыства аматараў гісторыі і археалогіі”, супрацоўнікаў Інстытута гісторыі НАН Беларусі. Цікава, што ў кнізе надрукаваны звесткі не толькі аб палявых адкрыццях, але і аб артэфактах, што захоўваюцца ў музеях і прыватных калекцыях. Апублікаваныя матэрыялы істотна папоўнілі крыніцазнаўчую базу для вывучэння старажытнай гісторыі Чарнігава-Северскай зямлі. Выданне багата ілюстравана. Некаторыя спецыялісты ўжо паспелі параўнаць “Археологические исследования в Еврорегионе “Днепр” з сусветна вядомымі “Археологическими открытиями”, якія выдаваліся з 1965 па 1986 год Інстытутам археалогіі АН СССР і ўзноўлены ў 1993 годзе Інстытутам археалогіі РАН. Наступны выпуск штогодніка “Археологические исследования в Еврорегионе “Днепр” па выніках даследаванняў у бягучым годзе павінен выйсці ў 2013 годзе.