Культурныя ідэі на “кірмашы праектаў”

4 красавіка кампанія “Будзьма беларусамі” збірае ў Гомелі таленавітых і неабыякавых да культурнага развіцця свайго горада творчых асоб. Сустрэча, на якой будуць прапанаваны  10 аўтарскіх прэзентацый у фармаце “маланкавай размовы” (lightning talk) і іх абмеркаванне, адбудзецца ў канферэнц-зале Цэнтральнай гарадской бібліятэкі (вул. Савецкая, 26). Пачатак у 17:00. Нагадаем, што “Будзьма” абвясціла аб удзеле ў гэтым праекце месяц таму. За гэты час аўтары ідэй звярнуліся да арганізатараў “кірмаша” з разнастайнымі прапановамі. Тут і “Талака” з арт-майстэрняй, праект арт-вуліцы, арт-хаўз кіно з Алегам Боклагам, ідэя вулічнага паэтычнага фэста ад Ганны Новік, праект "Замчышча", цыркава-тэатральны праект і  гэтак далей. Прыходзьце, каб пабачыць усё гэта. Будзе цікава. Уваход вольны.