Юбілей аўтара неўміручага “Міколкі-паравоза”

115 гадоў таму назад на Віцебшчыне нарадзіўся Міхась Лынькоў, будучы народны пісьменнік Беларусі, член-карэспандэнт і акадэмік АН БССР. Лёс творцы звязаны і з нашай Гомельшчынай: бацька быў чыгуначнікам, і сям’я часта пераязджала. У 1917 годзе Міхась скончыў Рагачоўскую настаўніцкую семінарыю.

У бабруйскі перыяд жыцця Лынькоў стаяў ля вытокаў стварэння мясцовага аддзялення беларускага літаратурнага аб’яднання “Маладняк”.

З 1930 года пісьменнік жыве і працуе ў Мінску. У 1938 — 1948-м Лынькоў узначальвае Саюз пісьменнікаў Беларусі. У першыя два гады Вялікай Айчыннай вайны пісьменнік і журналіст рэдагуе франтавую газету “За Савецкую Беларусь” (яна выходзіла на Заходнім, Цэнтральным і Бранскім франтах).

У 1943 —1946 і пазней у 1949 — 1952 гадах Міхась Ціханавіч Лынькоў — дырэктар Інстытута літаратуры, мовы і мастацтва АН БССР. У 1962 яму прысвоена ганаровае званне народнага пісьменніка Беларусі.

Змалку ўсім нам палюбіўся герой лынькоўскай аповесці “Міколка-паравоз”, якая ў 1956 годзе была экранізавана “Беларусьфільмам”. Значнымі тыражамі ў свой час выйшлі і раманы пісьменніка “На чырвоных лядах”, а таксама эпапея ў чатырох кнігах “Векапомныя дні”.