ЗАГУЧАЛІ ГАЛАСЫ МАЛАДЫХ

Напярэдадні Дня моладзі выйшаў з друку дзявяты выпуск альманаха абласнога аддзялення грамадскага аб’яднання “Саюз пісьменнікаў Беларусі” “Літаратурная Гомельшчына”. Аднак на гэты раз чытачы тут практычна не знойдуць твораў членаў пісьменніцкай арганізацыі.

На здымку: Новае выданне: “Літаратурная Гомельшчына. Творчасць маладых: славянскі вянок”.

Гэты нумар згодна рашэнню савета аддзялення цалкам аддадзены маладым аўтарам з Гомеля і вобласці. Іх заўважылі і падтрымалі старэйшыя калегі з Саюза пісьменнікаў Беларусі на творчых семінарах і вечарынах, шэраг наведваюць розныя аматарскія літаратурныя аб’яднанні ў вобласці, а некаторыя з пачаткоўцаў сталі лаўрэатамі абласных і рэспубліканскіх літаратурных конкурсаў. Лепшае з напісанага творчай моладдзю Гомельшчыны і прадстаўлена чытачу.

– Разам з тым, пад адну вокладку мы палічылі мэтазгодным змясціць і творы маладых аўтараў з Расіі і Украіны, – распавядае рэдактар выдання, старшыня аддзялення ГА “Саюз пісьменнікаў Беларусі” Уладзімір Гаўрыловіч. – У новым зборніку даволі моцна гучаць галасы маладых і з Масквы, Бранска, Краснадара, Рыльска, Курска, Сумаў і іншых расійскіх і ўкраінскіх рэгіёнаў. Атрымаўся даволі моцны зборнік маладой славянскай літаратуры. Прыемна, што ён выходзіць на шырокія прасторы ў Год моладзі ў Беларусі, Год літаратуры ў Расіі і, перакананы, будзе яшчэ адным важкім унёскам у справу зберажэння адзінства славянскіх народаў.

На 230 старонках альманаха адной з важных тэм гучыць 70-годдзе Перамогі савецкага народа ў Вялікай Айчыннай вайне над фашысцкай Германіяй. Гэта Перамога з’яўляецца агульным здабыткам народаў СССР. Для многіх гомельскіх літаратараў-пачаткоўцаў, маладых творцаў са славянскіх краін, тэма вайны і подзвігу Чалавека – не нешта паўсядзённае, радавое. З асаблівым хваляваннем пачаткоўцы пішуць пра тое, што, магчыма, ім расказвалі дзядулі, бабулі – сведкі вайны, іх бацькі.

А яшчэ ў савеце аддзялення СПБ перакананы: невялікае выданне злучае ў адзінае думкі, душы маладых творцаў Беларусі, Расіі і Украіны. Дарэчы, першая прэзентацыя выдання адбудзецца ў час фестываля “Славянскае адзінства-2015” у Лоеве Гомельскай вобласці.